الموقع الرسمي لمجلة حور الدنيا
مجلة شبابية



تحقيقات

2015-08-27
 

صفاء عبد مرتضي وحوار مع الإعلامية لمياء فهمي عبد الحميد

More articles by »
Written by: admin

حوار: صفاء عبد المرتضى

– مؤهلك الدراسي ؟
درست سياحة وفنادق أولا ثم درست الإعلام بعد ذلك.

– حدثينا عن أولادك….
عندي رؤية 14 سنة وكريم 11 سنة.

– أهم هواياتك؟
أحب الرسم جدا.

– ماذا ورثت رؤية ابنتك منك؟
رؤية هي كمان بترسم حلو أوي ووارثة الموهبة دي عني وعن جدها الله يرحمه لأنه كان خريج فنون جميلة وكان بيدرس هناك، بالإضافة إلى أنه كان رئيس قسم الرسوم المتحركة في التليفزيون المصري.

– وماذا ورثت أنت من والدك المبدع فهمي عبد الحميد رحمه الله؟
إني بأحب شغلي أوي أوي لدرجة الجنون وبابا الله يرحمه كان كده ، كان المقام الأول في حياته هو الشغل.

– هل يطغى حبك لعملك على بيتك أحيانا؟
بحاول طبعا على أد ما أقدر أوازن بين شغلي وبيتي وأولادي، لكن ماكدبش عليكي كل ده بييجي على حساب صحتي في الآخر .. هي معادلة صعبة وأنا بأحلها بإني أدي هنا كويس أوي وأدي هنا كويس أوي بس في الآخر بآخد من نفسي وبآجي على حساب صحتي.

– تنوعتِ في تقديم العديد من البرامج فأيهم أقرب إليك؟
بأحب أوي البرامج الدينية الاجتماعية اللي بأربط فيها الدين بحياتنا لأنه لو حاولنا نلاقي علاج لأي حاجة في حياتنا هنلاقيها موجودة في كتاب ربنا سبحانه وتعالى .. فلما بنتكلم عن أي مشكلة موجودة في حياتنا هنلاقي حلها في ديننا يعني متروحيش تدوري في حتة تانية.

– وما سر حبك لهذه النوعية من البرامج؟
لأني من خلال البرامج الدينية الاجتماعية بأشعر إني بأدخل جوه بيت المشاهد وهو ده الهدف الأساسي بالنسبة لي.

– وكمشاهدة أي أنواع البرامج تستهويك ؟
البرامج اللي بتتكلم عن حدث اجتماعي عايشين فيه .. برامج التوك شو كلها ، لكن أنا مشكلتي إني مش بس بأقدم برنامجي الهوا لأ ده أنا طول اليوم بأحضر وأجهز للي هقدمه بعد كده، فتلاقي وقتي ضيق أوي إني أقعد أتفرج على التليفزيون.

– كيف تعدين لحلقات برنامجك؟
الإعداد بياخد مجهود كبير جدا خاصة إن أنا بقالي 5 سنين باعمل ” كلام من القلب “، والضيوف بتوعي ثابتين فإني ألاقي موضوعات جديدة كل يوم ده موضوع صعب، أو إني أكرر موضوع ويطلع بنفس الشكل برضه بيبقى فيه ملل حتى عليه أنا شخصيا بأحس إن أنا سألت الأسئلة دي قبل كده .. فكوني ألاقي موضوع تناولته قبل كده بشكل مختلف أكيد بياخد مجهود كبير جدا.

– إذن لماذا لا تجددين في ضيوف حلقاتك؟
المشاهد ارتبط بالضيوف أوي، وأنا ضيوفي عزاز على قلبي جدا عارفه لما ضيف متعودة كل أسبوع بيجيلك، خصوصا إن أنا عِشرية زيادة عن اللزوم ففكرة إن أنا أبدل ضيف بضيف دي صعبة عليه.. ممكن أعمل ده لما الضيف بيعتذر لظروف معينة ممكن أجيب حد بداله لكن إني أثبت حد مكان ضيف أنا اتعودت إني بأشوفه كل يوم حد أو كل يوم اتنين بيبقى الموضوع صعب شوية.

– هل لك بعض التحفظات في برنامجك؟
برنامجي بسيط جدا مفهوش كلكعة إحنا زي ما بنقول في التتر كده:” كلامنا شبه الطبطبه “، فالحياة بسيطة وبأحاول أتكلم في كل المشاكل اللي موجودة جوه كل بيت.

– ماذا تعني محبة الجمهور لك؟
محبة الجمهور بالنسبة لي هي كل حاجة في الدنيا .. هي الباسبور أو التأشيرة اللي أنا عديت بيها.

– مميزات وعيوب الشهرة من وجهة نظرك؟
في رأيي ما دام اشتهرتي يبقى انت علمتي، وما دام علمتي يبقى انت نجحتي ، فالشهرة تتويج للنجاح.
أما عن عيوبها فإنك أحيانا بتبقي عايزة تنفصلي عن الناس يعني ساعات بأكون تعبانة مش قادرة أتكلم أو مش في المود فبأضطر أضغط على نفسي لأني محطوطة في فرام معين.

– هل ثمة شبه بين عيون الناس وعدسات الكاميرات؟
اختلاطي وتعاملي مع الناس أسهل من وقوفي أمام الكاميرات، وتصوري إن أنا شغالة مذيعة هوا حوالي 14 سنة إلا أني كل مرة بأحس إن الكاميرا لها رهبتها ولازم أبقى ملتزمة أدامها بحاجات معينة . أمام الكاميرا بتبقي مش عارفه مين شايفك لكن لما بتتكلمي مع حد وجها لوجه وانت شايفاه بيبقى الموضوع أسهل بكتير.

– صفات المذيعة الناجحة في نظرك؟
إنها تبقى بسيطة أوي، قريبة من الناس أوي، مايبقاش فيه تكلف لا في اللبس ولا في الماكياج ولا في الأسلوب لأن البساطة في كل شيء هي اللي بتفتح كل الأبواب.

– وما هي الصفات التي يجب أن تتخلي عنها؟
يجب أن تتخلى عن العصبية الشديدة، التحيز لحاجات معينة، أو انه ميكونش فيه ابتسامة على وشها، خصوصا لما بتتكلم في موضوع محتاج ابتسامة فبتقفل اللي قاعد بيتفرج.

– هل شعرتي يوما بالغيرة؟
لا والله عمرها ما حصلت، واسألوا عني زميلاتي المحجبات كلنا أصحاب وحبايب، وبفرح جدا لما بلاقي حد منهم عامل حاجة كويسة، علطول بأرفع سماعة التليفون وأهنيه.

– وكيف تتعاملين مع من يغارون منك؟
ولا كأني واخده بالي، بأتعامل معاهم أحسن ما بأتعامل مع العادي.

– ماذا تعيبي على مقدمي البرامج اليوم؟
مبعرفش أعيب أو أنتقد أي حد ، أنا بأقبل كل واحد زي ما هو، والمشاهد له حرية الاختيار يتفرج على مين أو ميتفرجش على مين.

– هل تواجهين مشكلة حتمية الظهور بملابس جديدة في كل حلقة؟
“ضاحكة”: يا نهار أبيض مش قادرة أقولك.. وخاصة إن أنا يمكن مميزة في الحتة دي أوي ويمكن فيه سبوت عليه في الأزياء واللبس .. أنا فعلا بأعاني معاناة فظيعة في الموضوع ده.

– وهل من الممكن أن ترتدي ملابس مكررة؟
آه طبعا لأن ده الطبيعي إحنا في حياتنا مبنشتريش طقم ونرميه.. لكن لما آجي ألبسه تاني وتالت ورابع وعاشر ممكن أغير الطرحة ، أغير الإكسسوار، ألبسه على بلوزة لون تاني زيي زي أي حد.

– هل يختلف ماكياج المذيعة المحجبة عن غير المحجبة؟
يختلف الماكياج باختلاف الشخصية ، أنا مبحبش أحط كتير على الرغم من إن فيه بعض الناس بتقولي ماكياجك بيظهر تقيل أوي! لكن ده مبيبقاش مني لكن ممكن يكون راجع للإضاءة أو ظبط الألوان فأحيانا الواحد بيتظلم.

– من يقوم بلفات طرحك المميزة؟
أنا من يوم ما طلعت على الشاشة محدش لفلي طرحتي أنا اللي بألفها لنفسي كل يوم، ولو اضطرتني الظروف ممكن أعمل ماكياجي بنفسي وده حصل كتير جدا. لأني كنت بأقعد جنب شريهان ونيللي في غرفة الماكياج، وعشان كمان بأحب الرسم فتلاقيني بأعرف أمسك الفرشاة كويس.

• أكمل ما يأتي :
– ………. محطات مهمة في حياتي.
برامجي مكارم الأخلاق ، والموعظة الحسنة

– ………. حافز لبذل مزيد من الجهد.
كلام من القلب

– الثروة عندي تتمثل في ……….
أولادي كريم و رؤية

– ………. كلمة لا توجد في قاموس حياتي.
التكبر والتعالي

– ………. هو عدوي اللدود.
الغرور

– ………. هو نقطة ضعفي.
أولادي

– أكثر ما يزعجني من الآخرين ……….
– الحقد والغل

– ………. من عيوبي التي أسعى دوما لتقويمها.

إني بأتكلم مع أي حد في أي حاجة!

– – بمعنى ؟
يعني تلاقيني قاعدة مع حد لأول مرة وأتكلم معاه كأني أعرفه بقالي سنين و ده سبب لي مشاكل كتير قبل كده، لأنك متعرفيش اللي أدامك ده كويس ولا مش كويس.

* إلى من توجهين هذه العبارات :
– كنت ولازلت قدوتي ومثلي الأعلى
والدي رحمة الله عليه

– يسعدني أن أهدي نجاحي إليك
إلى والدي أيضا

– كن كما أنت عليه
لمياء فهمي عبد الحميد

– راجع نفسك
أوجهها لنفسي أيضا، لأني لازم أعمل كشف حساب لنفسي أولا بأول.

– أنت تمشي في الطريق الخطأ
لأي حد متخيل إنه بذكاؤه ممكن يملك الدنيا كلها.

– وفقك الله وسدد خُطاك
إلى كل من يجتهد في عمله.

– وختاما: لمياء فهمي عبد الحميد برنامج عنوانه ……….. ؟
” كلام من القلب ” .

لمياء عبد الحميد

التعليقات

تعليقًا





 
 

 

أنت أيضًا تستطيع|زينب علي البحراني

أنت أيضًا تستطيع زينب علي البحراني “من يحلم بأن يهزمني فعليه أن يستيقظ ويعتذر عن ذلك”.. هذه الكلمات التي تلتهب الثقة في ...
by admin
 

 
 

الإستضعاف الذي يجلب الأستعطاف|احمدفرج

الاستضعاف الذي يجلب الاستعطاف اخرته وحشة اوي زي ايه زي خطيبه تحكي لخطيبها كل مشاكلها العائلية نقاط الضعف والمسكنة وتوصله ان...
by admin
 

 
 

ضرب الأبناء |أحمد فرج

نهي النبي صلي الله علية وسلم عن ضرب الوجهه لما يحمل من كرامة الانسان وان معظم التعبيرات والفكر واتخاذ القرار وادارة الاجهزة ...
by admin
 

 

 

متزعلش |احمد فرج

المقال ده خاص و مخصص للشباب والبنات الي ليهم آباء وامهات ارتقت ارواحهم الي مكانهم الجميل فين ؟ في جنات ونهر ايوا يعني فين ؟ في...
by admin
 

 
Advertisement
 

حاسس بيك |أحمد فرج

المقال ده مرضتش اسجله فيديو برضه لاني مش هقدر استجمع قوايا فيه وممكن بكل سهوله تنهار دموعي ومش هينفع اكمله قولت اكتبة احسن وا...
by admin
 

 




Advertisement