الموقع الرسمي لمجلة حور الدنيا
مجلة شبابية



مطرقعات

2013-03-13
 

رسالة إلى صديقي الحمار

More articles by »
Written by: admin

غــــية حمام

أحمد الصباغ

صباح الخير عزيزى الحمار ..

أعلم أن كلامي هذا لا يعنيك كثيرًا، وإن أولوياتك في هذه الساعة المبكرة من الصباح تنحصر في التبن والعلف والحشيش الأخضر ، وأنا ألمح في عينيك نظرة استخفاف مؤلمة خصوصًا وإننى بنى آدم كرمني الله عليك وإنك ولامؤاخذة حمار ..

صحيح إنك اثبتّ في كثير من المواقف إنك ذو صفات كريمة وصبر على الشدائد وفلسفة حكيمة في معالجة أزماتك الغذائية والمرورية .. لكن تبقى حمار .. وأنا الآن جئت إليك .. بصفتك صديقي .. شئت أم أبيت فأنت صديقي الذي لابد أن أنوّره (رغم انقطاع النور) وأفهمه وابصّره..

فلابد يا صديقي الحمار للواحد (سواء حمار و إنسان) أن يعلم الحد الأدنى من المعلومات عن صديقه، حتى تدوم المعرفة والصداقة والعِشرة الطيبة .. وبدون هذا الحد الأدنى تزول المعرفة والصداقة .. وأنا الآن – وأثناء تناولك وجبة التبن الصباحية – سوف أخبرك بعض المعلومات عني .. حتى تتزود بها فيعفيني ذلك من نهيقك المستمر ..

أنا يا صديقي الحمار مش إخوان مسلمين .. مالك بتبص لي كدة ليه؟ .. أعلم أن الموضوع مفاجيء بالنسبة لك .. خصوصًا وأنا أدافع ليل نهار عن حق الإخوان المسلمين في الممارسة السياسية ودعمت مرشح الإخوان للرئاسة بشدة في مواجهة مرشح النظام القديم .. ولازالت أهاتي ليل نهار دفاعًا عن الرئيس الإخواني .. وأمدح في حسن البنا كإنه من بقية أهلي .. وأجد في تاريخ الإخوان .. الله طب إزاى مش إخوان؟؟ .. وأعلم أن من الصعب – على حمار مثلك – استيعاب هذه المعلومة وانت معاشرني وعارفني بقالك فترة لا بأس بها من الزمن ..

بصي يا حمار .. لامؤاخذة والله ما قصدي أشتمك أنا بس عايزك تركز معايا وتسيبك من التبن .. الخناقة بتاعة ثورة 25 يناير كانت بين مين ومين؟؟ هقولك أنا عشان عارف إنك مركز في التبن .. الخناقة كان بين طرفين ممكن وصفهم بأكثر من اسم حسب تناول الموضوع .. وكلها مسميات صحيحة .. خد عندك :

ثورة الشعب ضد نظام حسنى مبارك .. آآآآه

ثورة مدنية ضد النظام العسكرى .. آآآآآه

ثورة مظلومين ضد مستبدين .. آآآآآه

ثورة شرفاء ضد حرامية .. آآآآآآه

الأربع مسميات دول صحيحة .. الشعب ثار على حسني مبارك ونظامه أو الناس المدنيين ثاروا على مبارك (الفريق طيار) اللي حكم مصر تلاتين سنة .. ومن قبلة تلاتين كمان عسكريين اللي هى فترة عبد الناصر والسادات .. ويا عزيزى الحمار حكاية إن العسكريين يحكموا البلد ده اختراع حصرى بالدول المتخلفة نجح واستشرى في الدول التي تقبع في ذيل القائمة اقتصاديًا وحضاريًا سواء كنت يا عزيزي الحمار بتحب واحد من الرؤساء دول أو لأ فالتجارب الأرقام والمقارنات بتقول كلهم فاشلين..

كمان يا صاحبي الحمار زي ما انت شوفت مبارك كان مشيب الشعب المصري وما كانش يوم بيعدي غير بكارثة أو حريقة أو عبارة بتغرق والأسعار بقت غالية نار والتعليم بقى زفت والدروس الخصوصية بقت كاوية الأهالي والصحة بقت زي القطران وبقينا أعلى معدلات الفشل الكلوي والبطالة والفقر في العالم .. الكلام جزء منه كان مقصود زي غلاء الأسعار والتعليم البايظ بهدف كوي الشعب وإسكاته وتفرغه للمعاناة وبعده عن ممارسة السياسة والبحث عن حقوقه .. وجزء منه كان غير مقصود ولكن كان إهمال ولا مبالاه زي حوادث غرق العبارات وحرايق المباني والقطارات الخ الخ..

الكلام ده يا عزيزي الحمار – بطل أكل تبن بقى – تم على مدار 30 سنة ما تمش في يوم وليلة .. لذلك يا صاحبي الحمار أنا كنت في صف الثورة .. وخرجت زيي زي ملايين من الشرفاء .. وقدمت اللي قدرت عليه .. صحيح ما كنتش من شهداء الثورة ولا حتى من مصابي الثورة لكن والنيعمة أنا وطني مخلص منحاز للثورة وبحب مصر وبتمنى لها الخير بغض النظر عن أي اعتبارات ..

قوم بقى لما الثورة خلصت وبدأ الصراع بين الثورة وبين المجلس العسكري .. بدأ يظهر الإخوان المسلمين كما لو كانوا محايدين .. واقفين كدة على الخط .. مرة ينزلوا الميدان ويمشوا العصر ومرة ما ينزلوش ويبقى طيبين ومهاودين المجلس العسكري .. بعدين حصلت انتخابات برلمان واكتشفت إن نص الشعب تقريبًا واخد نفس موقف الإخوان .. الله دول مش خونة بقى .. ولكن صوابعك مش زي بعضها .. أنا صحتي ووقتي وظروفي وطاقتي وحماسي وقدرتي تسمح لي باستمرار الصراغ كام سنة كمان .. وناس تانية ما عندهاش القدرة دي وعايزين يلموا الليلة ويهدوا ويبقى الوضع كما هو عليه .. إن السلطة بدل ما تبقى في إيد العسكر .. تبقى في إيد الإخوان والعسكر بس يبقى في انتخابات ديمقراطية عشان دي اللي هتضمن إن بعد شوية يدخل فصيل تاني في السلطة (الليبراليية مثلًا أو اليساريين أو الناصريين زي حمدين صباحي وغيره) .. ماااااااااشي

فأنا يا عزيزي الحمار كلام في سرك كنت واحد من اللي مش محبذين النزول فى محمد محمود والعباسية ومجلس الوزرا وغيرهم .. واحد من اللي بيقولوا نمشيها انتخابات ودستور ورياسة وكلام من ده .. شايفك بتبص لي وكإنك عايز تقول ما هي النتيجة إنهم حلوا البرلمان أهو يا حيلتها .. أقولك معلش .. يتحل البرلمان يتعمل برلمان غيره .. ويبقى ممثل بشكل أفضل ويبقى الإخوان أقل والتيارات التانية أكتر .. معلش كل تأخيرة وفيها خيرة ..

نيجى بقى يا عزيزي الحمار لحكاية الدكتور مرسي .. بص أنا عارف إنك مش مصدق إن الدكتور مرسى ما بياخدش أوامره من المرشد وإن الدكتور مرسى ما بيعليش مصلحة مصر فوق مصلحة الإخوان .. بس مش هجادلك في دى لإن مفيش ضامن يضمن لك إنه ما بيسمعش كلام فولان ولا علان مهما قولت واتكلمت .. بس هقولك إن أى رئيس هيجي هيقعد أربع سنين ولو أساء هيمشي غير مأسوف عليه .. أما لو ظلم وطغى وتجبر وسرق فهنقوم بثورة عليه قبل ما يكمل الأربع سنين .. أنا عايزك بقى تقول – رغم إنك حمار – هل دكتور مرسي طغى وتجبر وسرق؟ عرفت إن في أحمر منك؟ اللي بيقولوا نعمل ثورة على دكتور مرسي قبل ما يكمل شهرين في الحكم.. 

وبعدين يا عزيزي الحمار .. الدكتور مرسي قبل ما يوصل للحكم بساعات قام المجلس العسكري منزل بيان مكمل شال منه شوية صلاحيات كانوا شايفينها إنها الصلاحيات الوااااو اللي هتخليه مالوهش لازمة .. 

العسكريين ما بيثقوش غير في عسكريين زيهم .. عشان كدة تلاقي كل المحافظين كانوا عسكريين وكل المديرين والتنفيذيين في كل المنشئات والمؤسسات الحيوية كانوا عسكريين .. لا بيثقوا لا في إخوان ولا في مدنيين .. بس حظهم بقى إن الإخوان كانوا أسرع من الفصائل المدنية التانية ووصلوا للحكم .. والعسكريين قرروا من أول يوم يدبحوا القطة للإخوان اللي في الحكم ممثلين في الدكتور مرسي .. ودكتور مرسي دخل في صراع عنيف مع التسعتاشر واحد بتوع المجلس العسكري .. ولاقى في ناس هتطلع من اللعبة زى الجنزوري راح واخده معينه في مكتبه .. وبدأت فترة حكم دكتور مرسى بتخبط شديد وأحداث عنيفة وكوارث فريدة ما كانتش بتحصل قبل كدة .. بعض الناس فهمت إن في حرب ضروس من قبل العسكريين يساندهم عبيد النظام القديم ضد دكتور مرسي .. وناس تانية كانت فاهمة إن الحوار ده بيدور فى مكتب دكتور مرسي :

مرسي : صباح الخير يا ابنى .. قطعت لي النور عن الشعب؟

مسئول : قطعناه يا فندم

مرسي : إوعى تكون قطعت النور عن حد من الإخوان

مسئول : لا يا فندم طبعًا دي حاجة ما تفوتش علينا

مرسي : أخونت الصحافة؟ خليت الصحافة كلها إخوان؟

مسئول : أيوة يا فندم

مرسي : قتلت لي شوية عساكر على الحدود وهما بيفطروا؟

مسئول : قتلنا يا فندم

مرسي : هجّرت شوية مسيحيين من أي حتة؟

مسئول : أيوة يا فندم من حتة إسمها دهشور .. ولسة هنهجّر كمان

مرسي : تمام كدة .. الله أكبر ولله الحمد

طبعًا يا صديقي الحمار أنا مكسوف منك وزمانك عمال تقول في سرك : وقال بيشتموا بعض ويقولوا يا حمير .. !

آه والله يا عزيزي الحمار في ناس فاكرة إن ده اللي بيحصل .. وفاكرة إن مكتب دكتور مرسي فيه مجموعة زراير لو داس عليها تقوم المشاكل تتحل .. ونازلين شتيمة ليل نهار في مرسي .. حتى الإعلام الحكومة والتليفزيون المصري والجرائد القومية نازلة تنبيط وتريقة وشتيمة من تحت لتحت في مرسي ورئيس وزراءه ..

طب تعرف يا عزيزي الحمار إن في واحد حمار زيك أحلّ دم الرئيس على الهواء مباشرة وقال هولعها نار ولما قفلوله القناة تخيل يا عزيزي الحمار الناس قالت إيه؟ قالوا : قفل له القناة تمهيد لقفل القنوات التانية وأخونة الإعلام..

معلش أنا عارف إن كلامى جارح وإنك زعلان منى لإنى شبهت صاحب القناة بيك .. بس والله ما أقصد لساني إتعود أقول على أي واحد غبي إنه حمار .. مع إنك بتفهم عنه كتير وعندك بصيرة أكتر منه.

عشان كده يا عزيزي الحمار أنا طول الوقت بدافع عن دكتور مرسي وعن الإخوان المسلمين رغم إني مش منهم ولا بقبص منهم ولا دكتور مرسي يقرب لي ولا حتى أنا متدين زيهم .. 

فياريت يا عزيزي الحمار مش كل شوية تقول لي إنت إخوان مسلمين وأنا أقعد أحلف لك إنى مش إخوان مسلمين؟ عشان خاطر النبي بطل حمورية .. وياللا .. كمّل أكل التبن.

التعليقات

تعليقًا





 
 

 

أنت أيضًا تستطيع|زينب علي البحراني

أنت أيضًا تستطيع زينب علي البحراني “من يحلم بأن يهزمني فعليه أن يستيقظ ويعتذر عن ذلك”.. هذه الكلمات التي تلتهب الثقة في ...
by admin
 

 
 

الإستضعاف الذي يجلب الأستعطاف|احمدفرج

الاستضعاف الذي يجلب الاستعطاف اخرته وحشة اوي زي ايه زي خطيبه تحكي لخطيبها كل مشاكلها العائلية نقاط الضعف والمسكنة وتوصله ان...
by admin
 

 
 

ضرب الأبناء |أحمد فرج

نهي النبي صلي الله علية وسلم عن ضرب الوجهه لما يحمل من كرامة الانسان وان معظم التعبيرات والفكر واتخاذ القرار وادارة الاجهزة ...
by admin
 

 

 

متزعلش |احمد فرج

المقال ده خاص و مخصص للشباب والبنات الي ليهم آباء وامهات ارتقت ارواحهم الي مكانهم الجميل فين ؟ في جنات ونهر ايوا يعني فين ؟ في...
by admin
 

 
Advertisement
 

حاسس بيك |أحمد فرج

المقال ده مرضتش اسجله فيديو برضه لاني مش هقدر استجمع قوايا فيه وممكن بكل سهوله تنهار دموعي ومش هينفع اكمله قولت اكتبة احسن وا...
by admin
 

 




Advertisement