الموقع الرسمي لمجلة حور الدنيا
مجلة شبابية



مطرقعات

2013-03-13
 

دفاعًا عن حق البوبي

More articles by »
Written by: admin

دفاعًا عن حق البوبي

نور الدنيـــا

صالح سعــيد

عايزك ضروري ..هستناك عند النافورة في مونزا ..هكذا قال لي سعيد ابن عمتي في التليفون بحماس ولأننى أعرف سعيد جيدًا خصوصًا لما يبقى متحمس ببقى عارف إن الموضوع تافه جدًا وممكن يتأجل لدرجة النسيان ..المهم إني نزلت وقابلته وفوجئت بإنه فعلًا عايزني في موضوع مهم خاص به يستلزم التفكير وبعمق وارتفاع كمان ..ولأن مونزا تتمتع بشوارعها النظيفة الخضراء التي تساعد على التفكير وليس الصمم  قررنا أن ندردش في قصته وإحنا ماشيين ..اتكلمنا ..حكينا ..سرحنا مفكرين في حل لمشكلته ..وأثناء السرحان المشترك ده فوجئت بصوت نباح  كلب عالي جدًا  يقطع هذا السكون  وفوجئت بأن سعيد اتخض خضة مشفتهاش في حياتي ..ومنكرش إني اتخضيت لكن خضتي لا تقارن بحالة الفزع التي انتابت سعيد لأنه اتنفض بشده وكلبش فيّ قبل ما أهرب منه ..المهم إنني عندما نظرت لمصدر النباح العالي والخضة الأعلى  فوجئت بأنه كلب صغير جدًا وقصير جدًا _كلب قزم_انتابتنى حالة هستيرية من الضحك على سعيد وإحنا واقفين نبص على الربع كلب ده وصاحبه العجوز وزوجته يهدئان من روع الكلب ..المهم إن سعيد اشتاط غيظًا وخضة  وقام بتفريغها  في الكلب وشتمه بالإيطالي ..قلت له عيب متعملش مخك بمخ الكلب ده انت راجل كبير وهو زى ما أنت شايف مواليد ستة الصبح  ويلا نمشي ..التفتنا لنكمل طريقنا فوجئنا بثورة عارمة من العجوز الإيطالي وقام بإيقاف سعيد في الشارع وسؤاله بحدة لماذا يشتم الكلب ويقول اللعنة عليك إنك كلب ابن كلب – شكله كلب ابن ناس – ولم يرد عليه سعيد بهدوء بل رد بحدة أكثر منه – بواقي الخضة الكلبية – بأنه مصمم على رأيه وإن الكلب ده فعلًا كده ..ازدادت ثورة العجوز وانضمت إليه زوجته دفاعًا عن حق الكلب في النباح المجسم ..وأنا واقف مندهش لأني حسيت إن الموضوع يقترب بشدة من الخناقة بين سعيد وأصحاب الكلب  وحاولت تهدئة سعيد بأنه مفيش داعي للمشاكل وبعد كده لو نبح في وشك اشتم الراجل ومتشتمش الكلب بتاعه لأنك شايف غلاوته عنده ومش مستحمل عليه حتى الشتيمة …وحاولت من ناحية أخرى وعلى قدر ما أملك من إيطالي أن أهدئ من روع ابن قصدى صاحب الكلب الإيطالي موضحًا له بأن سعيد مكنش واخد باله من غلاوته عندك ..ومش حتة كلب اللي هيبوظ العلاقات بين الشعبين المصري والإيطالي ونفرج على بعض في الشارع …الغريب إنه وسط محاولاتي لرأب الصدع بين الطرفين  كان الكلب مش ساكت  ناظرًا لصاحبه العجوز وهاتك يا نباح كمن يقول له إوعى تسيب حقي إحنا بينا عيش وعضم ووسط نباحه كنت أنظر إليه قائلًا ارتحت كده يا بوبي فزعت الراجل وهنضرب بعض و كله من تحت رأس صوت نباحك …المهم إنه وبعد طول انتظار تم السيطرة على الموقف والراجل خد كلبه ومشي وكملنا أنا وسعيد طريقنا ..نسيت الموضوع المهم اللي عايزني فيه وقعدت أضحك عليه لأنى افتكرت منظره وهو مخضوض ..طالبنى بعدم الضحك لأنه كده ممكن يرجع يقتل الكلب ..كلمته بجد وقلت له شوف الراجل بيدافع عن حق الكلب إزاي؟وخايف على مشاعره  إزاي؟ ولأن سعيد هنا من خمس سنين قاللي انت متعرفش حاجة ..وحكالي سعيد – نسي هو كمان موضوعه المهم – بأن الناس دي بتعامل الكلاب بشكل آدمي لأقصى درجة ..لدرجة إنه الكلب لو ضاع لاقدر الله بيعملوا عليه إعلانات في الشارع بصورته ومواصفاته بحثًا عن البوبي المفقود مع وضع مكافأة مالية ضخمة لمن يعثر عليه.. داعبته باقتراح مني وهو أن يقوم هو بسرقة البوبي وأنا أقوم بارجاعه  ونقسم المكافاة بالنص بس بشرط وهو بيسرقه ميتخضش من صوته ..رمقني بنظرة نارية  وأكمل  بأن للكلاب دكتور خاص بيهم ومش دكتور بيطري عمومًا ده دكتور كلاب متخصص في علاجهم من الصداع والأرق وعسر العضم أو الهضم …وإنه كان بيشوف الكلب أمام العيادة وهو متردد في دخولها خوفًا لأن ده معاد الحقنة ..اندهشت من كلام سعيد حتى رأيت بعيني بعدها بأسبوع مسابقة عالمية رياضية للكلاب في ملعب رياضي كبير هنا في مونزا وسط اهتمام إعلامي كبير ..حيث توافد هنا أصحاب الكلاب من مختلف بقاع العالم مستعرضين مهارات كلابهم في القفز والعدو والعض وكل متسابق يحمل علم بلاده في يد واليد الأخرى بها سلسلة الكلب ..عقدت مقارنة سريعة وقاسية بين بلاد الكلاب فيها عايشة حياتها وواخدة كل حقوقها ..وبلاد أخرى البنى آدم فيها زهق من البحث عن الحد الأدنى من حقوقه الضائعة انتهت المسابقة وفاز الكلب الأمريكي بالمركز الأول وتم تسليم الكأس – العضمو الذهبية –  لصاحبه وسط دموع الفرحة لمشجعيه ..وعزف السلام الوطني الأمريكي

التعليقات

تعليقًا





 
 

 

أنت أيضًا تستطيع|زينب علي البحراني

أنت أيضًا تستطيع زينب علي البحراني “من يحلم بأن يهزمني فعليه أن يستيقظ ويعتذر عن ذلك”.. هذه الكلمات التي تلتهب الثقة في ...
by admin
 

 
 

الإستضعاف الذي يجلب الأستعطاف|احمدفرج

الاستضعاف الذي يجلب الاستعطاف اخرته وحشة اوي زي ايه زي خطيبه تحكي لخطيبها كل مشاكلها العائلية نقاط الضعف والمسكنة وتوصله ان...
by admin
 

 
 

ضرب الأبناء |أحمد فرج

نهي النبي صلي الله علية وسلم عن ضرب الوجهه لما يحمل من كرامة الانسان وان معظم التعبيرات والفكر واتخاذ القرار وادارة الاجهزة ...
by admin
 

 

 

متزعلش |احمد فرج

المقال ده خاص و مخصص للشباب والبنات الي ليهم آباء وامهات ارتقت ارواحهم الي مكانهم الجميل فين ؟ في جنات ونهر ايوا يعني فين ؟ في...
by admin
 

 
Advertisement
 

حاسس بيك |أحمد فرج

المقال ده مرضتش اسجله فيديو برضه لاني مش هقدر استجمع قوايا فيه وممكن بكل سهوله تنهار دموعي ومش هينفع اكمله قولت اكتبة احسن وا...
by admin
 

 




Advertisement