الموقع الرسمي لمجلة حور الدنيا
مجلة شبابية



متنوع

2013-03-13
 

من الحياة

More articles by »
Written by: admin

من الحياة

أمل زيادة 

طبعًا دي حاجات عادية ممكن جدًا تكون في أغلب البيوت المصرية بس الحقيقة حبيت أشارككم بعض المواقف اللي روتها ليا الصديقات في ساعة صفا طبعًا كلنا عارفين بيوتنا كلها مشاكل وهموم وروتين يومي الشغل … الأولاد مشاكلهم
النهارده الولد مريض لا .. أخوه اتنقلت له العدوى طبعًا بعد الشر على كل المتابعين مشاكل ضغوط الحياه
غلاء …..حر….. زحمة مرور….. سحابة سوداء ….خناقات زوجية ! كان لابد من التوقف أمام معاملة الزوج لأنه في الأصل داخل كل رجل طفل كبير في منا من تتقن فن التعامل معه ومنا من تمل بسرعة ومنا من تجهل كيف تتعامل معه وطبعا لازم نتفق أن المركب اللي ليها اتنين رؤساء لازم تغرق فلازم يكون لمركب الزوجية رئيس واحد لأنه مادام ارتضى الطرفين تكوين بيت وأسرة وعائلة
لابد أن يتحملوا عواقب فعلتهم يعنى لا أعاند وخلاص ولا أجادل لو أدركت بفطنة المرأة أن الطرف اللي أمامي
مش مقتنع طبيعة بشرية ممكن ، أو خلاف في التنشئة جايز  أو مفهوم خاطيء عن إدارة الأمور وأزمات الحياه مش بعيد برضو لازم المرأة الزوجة تكون حكيمة في تصرفاتها وتتعلم متى تصمت ومتى ترد وهذا لا يمنع إنها تنفجر كل مدة كدة إثبات وجود
تعبير عن القهر والسخط واعتراض على سياسات الزوج  المستبدة . وتطبيقًا لمبدأ نحن هنا وإياكي و ترك البيت مهما حصل ده بيتك مملكتك
هو اللي يمشي ! يعني مثلًا لو لقيتي  الزوج  بيزعق على الفاضي  . من غير سبب يذكر طبعًا تحت بند التلكيك عادي جدًا حطى أعصابك في ثلاجة وبمنتهى الهدوء وابتسامة الموناليزا وببروووووود
في إيه؟ طبعًا هو هيتجنن ويزعق أكتر عادى جدًا خالص يعني أهو عامل جو في البيت والله الزعيق له فوائده معنويًا على أقل تقدير
يعني بيشعر بوجوده وحاجة تانية أهو تغيير وتنفيس عن غضبه وأهو منظر أمام الجيران إحنا كمان عندنا زعيق إشمعنى إنتو ! ولو مثلًا  في نهار رمضان والدنيا صيام لقيتيه دخل المطبخ بعد يوم شاق في العمل والحر, ومثلًا اتعصب عليكي لأن زجاجة مياه مش باردة ولا نصفها بس
عادى جدا أصل المغرب ممكن يأذن بدري في اليوم ده وهو شايل هم أن ما يكون في مياه باردة جاهلة إنتي إزاي مثلًا تسيبي الزجاجة نصفها ولا لسه مش باردة غريبة والله طيب دي الثلاجة شغالة طيب التقصير منين بقى ؟؟؟؟؟

ولا كأن عندك أطفال مش بيصوموا ولا لسه لا سمح الله الساعة 2 ظهرًا والمغرب على 7 ونصف بجد غلطانة في حد لسه بيعمل كده ولا إنتي بتحبي تجيبي الكلام لنفسك يعني لازم تقدري إن مفيش حد صايم إلا هو وإن السبب في السيجارة والقهوة طبعًا نقصهم بسبب الصيام هو السبب مش هو لا سمح الله الأزواج دول ملائكة والله شريرة إنتي نيجي بقى لو الأولاد في يوم العطلة صحيو بدري شوية وهو استيقظ على هزارهم ولا حكاياتهم ولا يعني لو صوتهم ارتفع شوية أطفال يعني لازم تكوني مستعدة لدش الصباح من التوبيخ على الصبح وده لإنك غلطانة أكيد إزاى مش قادره تسكتيهم أمال وظيفتك إيه يعني ولا بطاريات الريموت كنترول خلصت طيب ممكن جدا تعمليهم على وضع الاهتزاز بس تعالي بقى قولي تخيل اليوم رحت السوق ولقيت إن الخضار الفولاني بقى بسعر كذا إيه الغلاء ده تلاقي نظرات الدهشة تعلو وجهه وكأنه من كوكب تاني وكأنه أول مرة يسمع أن في غلاء مش لا سمح الله إن الغلاء حديث الفضائيات والمدينة ورجل الشارع وتلاقي الإجابة في استنكار ليه ؟؟؟؟ ناقص يقولك انتي السبب في الغلاء ولا في فساد المحاصيل ولا كمان سبب موجة الحر اللي افسدت المحاصيل ويبقى يوم ما ظهرت له شمس لو كنتي مضايقهة من تصرفات أحد أقاربك وانتقدتى سلوك ما أمامه

ياه هات يا سرد بتجريح في عائلتك وطريقتهم وأسلوبهم في الحياه وإدارة الأزمات وقد إيه كلهم سلبيات و كل ده بالتفصيل الممل ومع ملاحظة ذكر مواقف عفى عليها الزمن وبتكون نتاج فعل يعنى رد فعل من جانبهم على أمر ما وهات يا مدح في عائلته ونجاح عائلته مش كفاية انجبت لنا الجهبز ويا سلام لو اشتكيتي من الولاد تخيل ابنك قال كذا أو بدر من التصرف كذا تلاقي على طول وابل من التأنيب إنتى كده على طول شكوى تذمر مش بقولك الأزواج دول ملائكة والخلاصة يعني إنتى سبب أى  كارثة طبيعية في العالم عادي جدًا ومش بعيد تكوني سبب تدهور الأوضاع الاقتصادية في البلاد ولا انهيار البورصة ما إنتي كزوجة سرك باتع وهو كتر خيره متحمل وساكت وروت لي صديقة إنها اتخانقت مع زوجها بسبب مول تخيلو هي بتقوله هأخد التاكسي ينزلني أمام المول كذا علشان أروح الشارع كذا وطبعًا المول والشارع من ثوابت وعلامة مميزة للشارع طبعا الزوج كتر خيره أفسد عليها معلوماتها وعكس الأمر  طبعًا هو اختلط عليه الأمر بينه وبين مول آخر الست لما يئست وأمام إصرار الزوج قالت له حاضر  أنا هركب التاكسي وهو أدرى وراحت تسألني إزاي أروح للمكان الفولاني فقلت لها عارفة المول كذا هو بجانبه طبعًا الست ضحكت وراحت حكت عن المشادة اللي بينها وبين زوجها وأجمعنا إنهم استحاله يعترفوا إنهم أخطأوا أو حتى يسكتوا لازم الفتوى تقريبًا اللي مش بيقدروا يعملوه أمام رؤساهم بيعملوه في البيت جميل إن الواحد يكون قيادي بس قيادي بعقل ومنطقية مش كلام في الهواء يعني لازم تكون أعصابك كلها في الفريزر علشان ما تصابيش بالأمراض المزمنة والغير مزمنة ويا سلام لو طبختي طبخة ما ، وما لها طريقة طهي إلا كده وفجأه على الأكل وأثناء التناول تلاقي تساؤل باندهاش إيه ده ؟؟؟

طبعًا الرد في بساطة دي كذا تلاقي الرد في استنكار لا طبعًا محدش بيعمل كده حد يحط على البسلة جزر مثلًا والمفروض الكوارع قبل ما تتقدم تتحمر حد يحمر الكوارع ياعالم الحقونا … والعجيب  في الأمر فعلًا إن نفس الوجبات لها نفس طريقة الإعداد تقريبًا يعني بس اللي بيتغير أو بيفرق من واحدة لأخرى: النفس, طريقة التقديم, االتتبيلة, كده بس اللي اكتشفته إن  نموذج الزوج ده متكرر في كل البيوت يعني مثلًا واحد اختلف مع زوجته على البابا غنوج هو يقول الباذنجان مسلوق

وهي تقول مشوي ! أنا بشوف إن الأكل والمطبخ ده تخصص الزوجة والزوج ماله دخل فيه إن شاء تطبخ عدس ولا إيه ؟  وكمان بشوف إن نموذج الزوج بتصرفاته كده تندرج تحت بند التلكيك وإنه كطبع فيه بيتخانق مع دبان وشه ومش عنده مشاكل تذكر زى الخلق والعالم بس اللي مش عارفة أفهمه ليه دائمًا بيصب غضبه على الواحدة ؟ واكتشفت مع الوقت إن الشكوى واحدة تقريبًا من كل الزوجات بس الحقيقه ده مش معناها إن الزوجات ملائكة  لكن الأكيد إن هناك  علاقه بين عمل الزوج وكاريره اللي بتترك عليه البصمات دي

التعليقات

تعليقًا





 
 

 

أنت أيضًا تستطيع|زينب علي البحراني

أنت أيضًا تستطيع زينب علي البحراني “من يحلم بأن يهزمني فعليه أن يستيقظ ويعتذر عن ذلك”.. هذه الكلمات التي تلتهب الثقة في ...
by admin
 

 
 

الإستضعاف الذي يجلب الأستعطاف|احمدفرج

الاستضعاف الذي يجلب الاستعطاف اخرته وحشة اوي زي ايه زي خطيبه تحكي لخطيبها كل مشاكلها العائلية نقاط الضعف والمسكنة وتوصله ان...
by admin
 

 
 

ضرب الأبناء |أحمد فرج

نهي النبي صلي الله علية وسلم عن ضرب الوجهه لما يحمل من كرامة الانسان وان معظم التعبيرات والفكر واتخاذ القرار وادارة الاجهزة ...
by admin
 

 

 

متزعلش |احمد فرج

المقال ده خاص و مخصص للشباب والبنات الي ليهم آباء وامهات ارتقت ارواحهم الي مكانهم الجميل فين ؟ في جنات ونهر ايوا يعني فين ؟ في...
by admin
 

 
Advertisement
 

حاسس بيك |أحمد فرج

المقال ده مرضتش اسجله فيديو برضه لاني مش هقدر استجمع قوايا فيه وممكن بكل سهوله تنهار دموعي ومش هينفع اكمله قولت اكتبة احسن وا...
by admin
 

 




Advertisement