الموقع الرسمي لمجلة حور الدنيا
مجلة شبابية



حوريات

2013-03-13
 

لن نتـــزوج

More articles by »
Written by: admin

لن نتــزوج

منار ممدوح عقل

السلام عليكم و رحمة الله و بركاته

لن نتزوج !!!

إيه الكلام ده بس يا منار اللي انت كاتبة عنه النهارده البلد في ثورة ..الناس في إيه وانتى في إيه؟

صباح الخير أولًا و إزاى حضراتكم ثانيًاً  , ثالثًاً بقى السطرين اللي فوق دول همّ السطرين اللي ممكن يخطروا ببال كثيرين بمجرد قرأة العنوان و أنا أولهم لذلك أردت أن أستعرضهم أمامكم لأجاوب على نفسي و أنا بقول أيوة وقته وحتشوفوا معايا من خلال الموضوع أنا أقصد إيه

بدايةً كده عنوان ” لن نتزوج ” مش من إبداعي و لكني فقط سمعت عن مقال كتبته أحد الزميلات بهذا العنوان من 5 سنوات و لو كنت أعرف اسمها و الله كنت حقوله على طول انتوا عارفين مبدئي مع موضوع حماية حقوق الملكية الأدبية ده , البنت دي حكوا لي انها كانت تعرض في مقالها معاناة الفتاه في ذلك الوقت من قهر الرجل بالأخص للفتاه التى تتعدى سن الـ30 أو التي تقف على حد الهاوية في نظرهم يعني 29 أو 29 و ربع أو 29 إلا ربع و كده يعني , وإنه عندما يتقدم إليها يبخسها حقها ظنًاً منه إنه فاتها القطار وإنها ستتنازل عن كل حقوقها الأدبية لتقبل بأى جوازة والسلام عشان تلحق قبل ما تتم 30 يعني , لذلك استخدمت الفتاة هذا المعنى الأدبي القوي ليس لإعلان قرار ولكن لإعلان ثورة  .. نعم ثورة  .. ثورة تمرد على هذا الفكر و كأن البنت كانت عايزه تقول للشباب بشكل غير مباشر مش انتوا فاكرين إنكم ماسكيننا من إيدينا اللي بتوجعنا .. طيب خلاص بلاها خالص لغاية ما تفهموا شرع ربنا صح في أمور الارتباط و تبطلوا فكر سوق الخضار اللي بتتباع فيه الطماطم الجامدة بسعر والمستوية بسعر تاني وهكذا وطبعاً من 5 سنوات إلى الآن انتشر هذا الفكر كثيراً و ذُبح نقاشاً في العديد و العديد من الجهات الإعلامية و الغير إعلامية و تصدر موائد النميمة وما زال يحتل الصدارة في أحاديث الفتيات لذلك لن أضيع أوقاتكم الثمينة في بحث الأمر هنا اليوم من جديد ولكنى سأستخدم نفس هذا العنوان فقط الذي ظل يدور برأسي سنوات وأقلبه يمينًاً و يسارًاً لأستكمل المعنى الذي يجب أن يدفع شخص ما لأن يستخدمه , يعني سألت نفسي مين تاني من الناس ممكن يثور قائلاً لن أتزوج غير الفتيات اللاتي تجاوزن سن الثلاثين و كمان سألت نفسي مين تاني من الناس لازم يتقال لهم هذا الكلام غير الشباب بتوع سوق الخضار إياهم فوجدت مثلاً الشاب اللي بيواجه استغلال من أهل العروسة بشكل خرافي مبالغ فيه حقه يقول لهم لن نتزوج , الفتاه الصغيرة في السن التى تواجه ضغوطاً قوية لقبول أي حد و خلاص قبل أن تدخل للسن الخطر و يوفتها القطار …الخ الفيلم العربي وهي مش راضية حقها تقول لن نتزوج , الشاب الذي يتجاوز سن الـ40 أو له ظروف اجتماعية خاصة مثل الإنفصال يعني ” مطلق ” أو أرمل …الخ و يلاقي البنات بترفض الاقتران به إلا إذا كان رجل ثري ..مش لذاته أو لشخصه ..كمان لازم يقول” لن نتزوج “

وغيرهم وغيرهم وغيرهم من نماذج سمحت فئات المجتمع الأخرى لنفسها سلبهم حقهم في الحياة وزي ما قلت هذا ليس قرارًا وإنما تمرد على أوضاع و عقليات مغلوطة إنه ليس قرارًاً وإنما صرخة تنبيه ترجمتها يتخلص في كلمتين ” أنا إنسان “

نعم أنا إنسان …و ليس من حقكم سلبي هذا الحق مهما تقدم بي العمر ..مهما كانت ظروفي المادية أوالمعنوية أوالاجتماعية ترفضوا هذا الإنسان أو تفكروا في أمره أيوة حقكم …طبعاً حقكم و مش مجبرين توافقوا على حد انتوا مش حاسينه أو مش قادرين تتحملوا ظروفه و تضحوا من أجل الاقتران به إنما تفرضوا عليّه معتقادتكم وترغموه على القبول بها لا و ألف لا ولو جينا بقى للبنت التي تجاوزت سن الثلاثين خصوصًا وسلطنا الضوء شوية على علاقتها بفئات متنوعة من المجتمع حنلاقي العجب في ناس طيبين حواليها بيتمنوا لها الخير و طول النهار صعبان عليهم بقى معقول فلانة الجميلة بنت الحسب و النسب الذوق الأخلاق بنت الأصول اللي مال و جمال اللي واخده أحسن شهادات لغاية دلوقتي متتجوزش , ويبتدوا بقى مجتمع الطيبين يهادوها بالنصائح الذهبية يا حبيبتي إقبلي أي حد و السلام …بخيل وإيه يعني انتي وأهلك تصرفوا على البيت مش متحمل للمسؤلية و ماله ما كلهم وحشين خدي أي واحد والسلام .. أهله مش مرحينك مفيش مشكلة ما انتي مش حتتعاملي معاهم ..مفيش توافق بينك و بينه و ماله و مين النهارده بيلقى حد شبهه ..مفيش قبول …عادي القبول كله إن شاء الله بيجي بعد الزواج وبعدين انتي عندك شقتك وعربيتك وشغلك ناقصك عيل تربيه وإذا أبوه معجبكيش اخلعيه  ,, أو العكس صحيح بقى ممكن تكون الفتاه معندهاش أي إمكانيات مادية فبرده ينصحها الطيبين نفس النصايح زي انتي وأهلك اصرفوا عليه و كل الرجاله كده ….الخ الديالوج

وفي الآخر تتغير الجملة عشان تكون مؤثرة قوي فيتقال لها يا بنتي العمر بيعدي وانتي كبرتي و محتاجة لحيطة تتسندي عليها من الأيام و خصوصًا إنك لا شقة و لا عربية ولا مال و لا جاه … ولو مر العمر من بين إيديكي حتتلطمي في الدنيا و تبهدلك الأيام…يا ستى جربي حتخسري إيه أهو راجل ساترك في بيته و لو معجبكيش ابقي اخلعيه وطبعاً كل هذه أفكار طيبة لناس طيبين

الأشرار بقي بيقولوا إيه ؟؟؟ تعالوا نشوف  ,, الأشرارهم كل صديقه تخاف تبلغ صديقتها إنها حامل مثلاً في الطفل التاني لحسن تحسدها لأنها يا عيني مش متزوجة و التانية جايبة طفل و داخلة في التاني , الأشرارهمّ كل رجل بيسمح لنفسه يتكلم بطريقه غير لائقة و فيها مضايقة لزميلة ليه في عمل أو دراسة لمجرد إنها غير متزوجه بعد…متناسيًاً كل حدودها الشخصية كفتاة متربية و فاكر بس إن الزاوج هو المانع الوحيد لإمرأة من ارتكاب أغلاط دينية و مجتمعية

هم كمان كل امرأه تغارعلى زوجها من كل معارفهم الغير متزوجات و تسمح لنفسها بأن تتصور إن كل واحدة مهما كانت مستواها الاجتماعي و الفكري و قبل منهم الديني والتربوي ..إنها ستتخلى عن كل هذا من أجل الحصول على زواج بأي طريقه وإن هذا الزواج بيتلخص في رجل واحد في الكون هو محط أهداف وأمنيات البنات جميعهن وهو زوج هذه السيدة العزيزة

والحقيقه إنني لا أريد أن أسترسل في ذكر أمثلة عن الأشرار و الطيبين في هذا المجال كي لا أطيل عليكم في نماذج نعرفها جميعاً معرفة يقين وإنما أريد أن أصعد بكم للسحاب لأخذكم لذلك المعنى المقدس وراء الارتباط ذلك المعنى الذي شرعه الله ليربط بين روحين و قلبين في الدنيا وتلك الرسالة السماوية الجميلة التي يكلف الله بها زوجين ليقدماها للمجتمع من خلال تربية نشء صالح أريد أن أذهب بكم لتلك اللحظات من المودة و الرحمة و التراحم التي أمرنا الله بها تجاه الأزواج من الطرفين , أريد أن أخبر الطيبين و الأشرار في مجتمعنا هذه الأيام أن لا تحزنوا و لا تخافوا من أو على كل من تأخر بها سن الزواج لأنكم شئتم أم أبيتم تضطرون لتزويجهم في نهاية المطاف بشرع الله في جميع الديانات وأقول شئتم أم أبيتم لأن الكثيرين في هذه الأيام يتزوجون لأغراض دنيوية مجتمعية بحتة و ليس لها أدنى علاقة بالدين أو بما شرعه الله و شرع الزواج من أجله لذلك دعوني أثور رافعة في وجه المجتمع شعار ” لن نتزوج” إلا إذا كان هذا الأمر صحيحًا ًبقدر كبير ,, لن نتزوج إلا بشكل صحيح من أجل أغراض صحيحة ..مثلما تمامًاً لن أتعلم إلا بشكل صحيح من أجل أغراض صحيحة ..ولن نعمل إلا بشكل صحيح من أجل أغراض صحيحة …ولن نحيا كل حياتنا إلا بشكل صحيح من أجل خدمة أغراض صحيحة

لن نتزوج خوفًاً من أي شيء أو خوفًاً على أي شيء وأنتم يا سكان المجتمع جميعًا من أهل وأصحاب و جيران و أقارب يجب أن تتقبلونا كما نحن فصديقتك لن تتزوج لمجرد طمأنة حضرتك مثلاً من نايحتها عشان تبطلي تخافي على زوجك منها و لكن حضرتك اللي حتتغيري و تبتدي تفكرى “هي زملتي دي بنت ناس و متربية وأخلاقها عالية ولا لا قدر الله ” مش كده , لو كانت وحشه تجنبيها متزوجة أو غير متزوجة و لو طلعت بنت ناس يبقى حضرتك اللي لازم تصححى نفسك , و قريبتكم الغير متزوجة رغم كبر سنها لن تتزوج لمجرد أنكم تخافون حسدها و لكنكم انتم اللي غلط ..و لازم تفكروا شوية هي بنت ناس و عينها مليانه و صاحبة موقف و إرداة و فكر و ليها وجهة نظر في الأمر …ولا إنسانة مريضة بداء الحسد يجب تجنبها حتى لو كانت متزوجة و لديها بدل الطفل عشرة

وزميلتكم الغير متزوجة لها حدود يجب أن لا يتخطاها أحد بدون إذنها فهي سترفض جميع مجاملات حضرتك السخيفة و التطفل على مشاعرها و مجرد التوهم بأنها للتسلية عشان لسه فاضية ..فهي فتاة حرة في بلد حرة …سيتحكم في قبولها من عدمه تربيتها و ليس الزواج أبدًاً

وجارتكم أو صديقتكم الحميمة التي تحبونها و تحبون الخير لها و مش مهم تتطلق المهم بس تتزوج عشان تفرحوا بيها لن تتزوج لمجرد إرضائكم و لن تتزوج لمجرد أنكم حزينون من أجلها و لو كنتم تحبونها بحق فيجب أن تنصوحها بالصح و ليس بما تعارف عليه المجتمع حقيقي مش عايزه أطول في كلام أشعر إنه نص ما تريدون قوله و أكثر فحلمى هو غلق كل الصفحات المشوهة من فكر المجتمع و أمنيتي أن يرزقنا الله بفجر جديد تتنفس فيه سماء بلادنا حرية الفكر و المشاعر و احترام الآخر بالشكل الذي يرضي الله سبحانه و تعالى

التعليقات

تعليقًا





 
 

 

أنت أيضًا تستطيع|زينب علي البحراني

أنت أيضًا تستطيع زينب علي البحراني “من يحلم بأن يهزمني فعليه أن يستيقظ ويعتذر عن ذلك”.. هذه الكلمات التي تلتهب الثقة في ...
by admin
 

 
 

الإستضعاف الذي يجلب الأستعطاف|احمدفرج

الاستضعاف الذي يجلب الاستعطاف اخرته وحشة اوي زي ايه زي خطيبه تحكي لخطيبها كل مشاكلها العائلية نقاط الضعف والمسكنة وتوصله ان...
by admin
 

 
 

ضرب الأبناء |أحمد فرج

نهي النبي صلي الله علية وسلم عن ضرب الوجهه لما يحمل من كرامة الانسان وان معظم التعبيرات والفكر واتخاذ القرار وادارة الاجهزة ...
by admin
 

 

 

متزعلش |احمد فرج

المقال ده خاص و مخصص للشباب والبنات الي ليهم آباء وامهات ارتقت ارواحهم الي مكانهم الجميل فين ؟ في جنات ونهر ايوا يعني فين ؟ في...
by admin
 

 
Advertisement
 

حاسس بيك |أحمد فرج

المقال ده مرضتش اسجله فيديو برضه لاني مش هقدر استجمع قوايا فيه وممكن بكل سهوله تنهار دموعي ومش هينفع اكمله قولت اكتبة احسن وا...
by admin
 

 




Advertisement