الموقع الرسمي لمجلة حور الدنيا
مجلة شبابية



حوريات

2013-03-13
 

سكة للسعادة

More articles by »
Written by: admin

سكة للسعادة

هـاجر خميس

المرة دي هاقولك على فوكيرة حلوة أوي تعمليها في الأجازة

 فوكيرة  هتخليكي سعيدة و تسعد اللي حواليكي و تأخدي عليها ثواب كبير .. و تملي وقت فراغك كمان , شوفتي كل ده في حاجة واحدة بس  ( سوبر حاجة  ) إيه رأيك تبقي متطوعة ؟؟ سمعاكي بتقولي : ” متطوعة فين يعني.. في الجيش ؟؟ “

لا يا ستي طبعًا إحنا بنات بسكوتات ملناش في الجيش و الكلام ده ,سمعاكي بتسألي .. أمال تطوع إيه بس في الهلال الأحمر ده أنا بخاف من الإبرة جوه الغلاف البلاستيك ,, بطلى لماضة بس و تعالي  هقولك ..

الدنيا دي فيها ناس كتير أوي محتاجة للمساعدة وفي  فعلًا  جمعيات خيرية كتير موجودة عشان تساعدهم  بس محدش بينفع يعمل كل حاجة لوحده !!! لازم معاهم  ناس جدعة كده اللي هم (المتطوعين والمتطوعات ) يساعدوهم عشان يكملو الخير ده, والسكة  علشان تكوني متطوعة  سهلة و بسيطة خالص , هتروحي لأقرب جمعية خيرية قريبة منك هتقولي لهم جملة واحدة  ” ممكن أبقى معاكم ؟ “

هيرحبوا بيكي أوي و يعرفوكي هما محتاجين إيه وانتي تقدري تساعديهم بإيه و إزاي ..

بس قبل الخطوة دي فيه حاجة مهمة أوي لازم تعمليها ,, خدي النية إنك رايحة تعملي خير لربنا و ثوابه منتظراه من ربنا و بس و اطلبي من ربنا إنه يخلص نيتك ليه و بس , فيه دعاء بس مش هقوله غلاسة علشان تدوروا عليه بنفسكم وأنا هقولكم كل حاجة؟

إسمه ” دعاء إخلاص النية ” ..  دعيتي و خدتي نية …

طب بصيلي  و بحلقي .. دلوقتي عيزاكي تأخدي نفس عميق كده و ترجعي بضهرك ورا و تتخيلي معايا المواقف دي و شوفي ساعتها هتكوني مبسوطة و لا زهقانة من الأجازة؟؟

تخيلي … لما تبقي الأخت الكبيرة لطفل يتيم وتروحي تزوريه و تصاحبي الأطفال اللي في الدار و لما تغيبي عليهم يسألو عنك  وأول مايشفوكي يجرو عليكي من الفرحة طب أمانة عليك دي فرحة تتنسي ؟؟؟

تخيلي .. لما تروحي تزوري مسنين أولادهم مشغولين عنهم و بيتمنوا حد يسأل عنهم و يضحكهم و يفضلوا يدعولك كتير أوي أوي و يستنوكي كل مرة و تحسي بعد كده إن كل الخيراللي في حياتك بسبب دعوة ماما و بابا و دعوتهم

تخيلي .. لما تفضلي تفرزي في هدوم عشان تتنضف و تخليها جميلة  كأنها جديدة ويجي المحتاج يخدها لأولاده على العيد و لا المدارس وتشوفيهم و هما بيختاروها في معرض صغنتت كده و يحسوا بفرحة اختيارها وانتي تشوفي ده في عينيهم , طب  كفاية تخيلات لحد كده , هقولك على سر  بيني و بينك ..

أحلى نشاط في أي جمعية إنك تقعدي تحضري الفطار في رمضان أو تحضري شنط الخير اللي فيها أكل بيتوزع على المحتاجين لها .. و يا سلام لو معاكي صحباتك  أو قرايبك و تقعدى تنادى عليهم يا بنت انتي هاتي الكياس .. انتي يا فلانة هاتي أطباق .. عدي يا توتة وصلنا كام وجبة .. حتى لو روحتي لوحدك و مش عارفة حد هناك ..صدقيني هتلاقي بناتيت كتير بقوا صحباتك جمعكم حاجة حلوة أوي هي  ( حب الخير) ,, عارفة ؟؟

 انتي مش محتاج فلوس ..و مش محتاجة يكون سنك  كبير ,, محتاجة بس

” نيــــــــــــــــة لعمل الخيــــــــــــــــر “

كانت معكم من فوق كرسي الكمبيوتر النبيتي

هاجر خميس

التعليقات

تعليقًا





 
 

 

أنت أيضًا تستطيع|زينب علي البحراني

أنت أيضًا تستطيع زينب علي البحراني “من يحلم بأن يهزمني فعليه أن يستيقظ ويعتذر عن ذلك”.. هذه الكلمات التي تلتهب الثقة في ...
by admin
 

 
 

الإستضعاف الذي يجلب الأستعطاف|احمدفرج

الاستضعاف الذي يجلب الاستعطاف اخرته وحشة اوي زي ايه زي خطيبه تحكي لخطيبها كل مشاكلها العائلية نقاط الضعف والمسكنة وتوصله ان...
by admin
 

 
 

ضرب الأبناء |أحمد فرج

نهي النبي صلي الله علية وسلم عن ضرب الوجهه لما يحمل من كرامة الانسان وان معظم التعبيرات والفكر واتخاذ القرار وادارة الاجهزة ...
by admin
 

 

 

متزعلش |احمد فرج

المقال ده خاص و مخصص للشباب والبنات الي ليهم آباء وامهات ارتقت ارواحهم الي مكانهم الجميل فين ؟ في جنات ونهر ايوا يعني فين ؟ في...
by admin
 

 
Advertisement
 

حاسس بيك |أحمد فرج

المقال ده مرضتش اسجله فيديو برضه لاني مش هقدر استجمع قوايا فيه وممكن بكل سهوله تنهار دموعي ومش هينفع اكمله قولت اكتبة احسن وا...
by admin
 

 




Advertisement